Çaush Kullafi: ‘’ Rakip Suli’’- Një vizionar që trasformoi Kamzën.

Rakip Suli është një prej atyre njerëzve që nuk kanë nevojë të prezantohen me fjalë, sepse puna e tij flet vetë. Kur ai mori drejtimin e Bashkisë Kamëz, ballafaqimi im i parë me të nuk ishte fizik, por me punët e mira që ai filloi të bënte në të gjithë zonën.

Te Rakipi pashë një përkushtim të jashtëzakonshëm ndaj arsimit. Ai ishte i përqendruar në ndërtimin e shkollave, kopshteve dhe institucioneve të reja arsimore. Shpesh e kam dëgjuar të shprehet: "Arsimi është objektivi im. Po nuk investove në arsim, nuk ke bërë asgjë për kombin tënd." Kjo qasje e tij ka sjellë ndryshime të prekshme në Kamëz dhe më gjerë.

Një tjetër sfidë e madhe për të ishte transformimi i liqenit të Paskuqanit. Nga një pellg moçalor dhe i paorganizuar, Rakipi synonte ta shndërronte atë në një park të bukur, me pemë, ambiente argëtimi dhe hapësira publike për aktivitete artistike. Por, për ta realizuar këtë vizion, fillimisht ai u përball me sfidën e pronësisë së territorit. Pa u bërë pronë e bashkisë, nuk mund të bëhej asnjë investim. Me këmbëngulje dhe përpjekje të vazhdueshme, ai ia doli që i gjithë territori i liqenit të Paskuqanit të kalonte në pronësi të Bashkisë Kamëz.

Sot, ky park është një perlë natyrore, ku çdo ditë pedonalja e tij mbushet me njerëz që shijojnë ajrin e pastër dhe hapësirat e gjelbra. Në mbrëmje, parku gumëzhin nga zërat e familjeve dhe të rinjve që shëtisin nën dritat që rrethojnë liqenin. Shpesh aty organizohen koncerte, ekspozita dhe aktivitete të ndryshme kulturore, duke e kthyer atë në një qendër të gjallë komunitare.

Në vitet që Rakip Suli drejton Bashkinë Kamëz, transformimi i zonës është i dukshëm. Ai nuk është thjesht një administrator, por një vizionar që punon me pasion për zhvillimin e qytetit dhe përmirësimin e jetës së banorëve të tij. Njeriu ndjehet krenar kur njeh njerëz kaq punëtorë dhe me një vizion të qartë për të ardhmen e komunitetit që mbulojnë.

Kudo të shëtitësh në territorin e Bashkisë Kamëz, sheh një kantier ndërtimi në rrugët e këtij territori, shtrime dhe asfaltime rrugësh, duke e bërë zonën më të aksesueshme dhe moderne. Rakipi është i thjeshtë, me etikë komunikimi, dhe zyra e tij është e hapur për të gjithë. Kushdo që ka shkuar në zyrën e tij ka gjetur ngrohtësi dhe një bashkëbisedim të sinqertë.

Rakipi është gjithashtu kërkues llogarie me vartësit e tij, duke u siguruar që ata të përmbushin detyrat e tyre për të mirën e komunitetit. Ai ka ende shumë objektiva për të realizuar për këtë bashki dhe vazhdon të punojë pa u ndalur.

“Po punoj,” thotë Rakipi, “që kur nesër të mos jem më kryetar bashkie, të shëtis në parkun e liqenit të Paskuqanit dhe njerëzit të më përshëndesin me mirënjohje.”