Fatmir Terziu
Vlora Pireva është shqiptarja nga Kosova që punon në Kompaninë e Kontratave të Karbonit të Ulët (LCCC) dhe Kompaninën e Zgjidhjeve të Elektricitetit (ESC). Ajo është eksperte në lëminë e resurseve humane. Kompania e Kontratave të Karbonit të Ulët (LCCC) dhe Kompania e Zgjidhjeve të Elektricitetit (ESC) janë në qendër të realizimit të synimeve të MB-së për energji elektrike të sigurt, të përballueshme dhe të qëndrueshme. Këto dy kompani private të kufizuara, në pronësi të plotë të Sekretarit të Shtetit për Biznesin, Energjinë dhe Strategjinë Industriale (BEIS) i njohur më parë si Departamenti për Energjinë dhe Ndryshimet Klimatike (DECC), u krijuan për të ofruar elementë kyç të Programit të Reformës së Tregut të Energjisë Elektrike të qeverisë. Si kompani në pronësi të qeverisë, LCCC dhe ESC qeverisen nga Frameëork Documents që përcaktojnë marrëdhëniet e aksionarëve dhe Parimin e tyre Udhëheqës. Misioni është të zbatohen dhe zhvillohen skemat e tregut të energjisë elektrike duke ofruar ekspertizë, njohuri dhe udhëheqje të pavarur.
Sikurse dihet, LCCC u krijua për të qenë homologu i Kontratave për Diferencë (CFD), një nxitje e re e krijuar nga qeveria për të sjellë përpara investimin e nevojshëm për të përmbushur në mënyrë të qëndrueshme objektivat e Mbretërisë së Bashkuar për energjinë elektrike të rinovueshme dhe të tjera me karbon të ulët. Roli kryesor i LCCC është të menaxhojë CFD-të me gjeneratorë me karbon të ulët gjatë gjithë jetës së tyre, gjë që përfshin menaxhimin e kontratave, si dhe Taksën e Detyrimeve të Furnizuesit që financon pagesat CFD. Kritike për këto funksione është parashikimi i çmimit të energjisë dhe aktivitetet e shlyerjes. Në të gjitha operacionet e saj, LCCC udhëhiqet nga parimi i saj udhëzues për të "ruajtur besimin e investitorëve në skemën CFD dhe minimizuar kostot për konsumatorët". LCCC gjithashtu drejton operacionet e shlyerjes së Tregut të Kapacitetit në emër të ESC.
Ndërsa roli i ESC është të mbikëqyrë zgjidhjen e tregut të kapaciteteve për të siguruar që pagesat e rregullta të bëhen për ofruesit e kapaciteteve që kanë rënë dakord të ofrojnë kapacitet në kohë stresi të sistemit. Këto marrëveshje kapacitetesh ndihmojnë për të mbajtur dritat ndezur në të gjithë Britaninë e Madhe.
Pra nëtë gjithë këtë angazhim të madh të Qeverisë Britanike është dhe shqiptarja nga Kosova, Vlora Pireva, që sikurse e thamë më lart është eksperte në lëminë e resurseve humane. Po cila është në fakt Vlora Pireva?
Vlora Pireva ka lindur në Lupc, një fshat afër Prishtinës, në vitin 1972. Shkollimin e mesëm dhe studimet universitare i ka ndjekur në Prishtinë. Është nga ajo gjeneratë ku për shkak të mbylljes me dhunë të Universitetit të Prishtinës nga represioni i Millosheviçit, studimet universitare i ka ndjekur në shtëpi private.
Vlora vjen nga një familje që njihet për aktivitetin patriotik e politik që nga viti 1968 ku babai i saj ishte një nga organizatorët e demonstratës së njohur të atij viti. Vlora u rrit në një frymë me plot dashuri për popullin shqiptar e trojet shqiptare, por asnjëherë me urrejtje për popujt e tjerë.
Për shkak të situatës së rënduar në Kosovë, në vitin 1997 Vlora u detyrua ta lë Kosovën për tu vendosur në Londër ku edhe jeton sot me bashkëshortin dhe dy vajzat e saj. Jetën në Londër Vlora e filloi si një nënë e re, sfidë kjo që ju shtua sfidave të tjera në një vend te huaj, larg familjes. Në një kohë kur Kosova ishte në luftë, përballja me një kulturë dhe mënyrë të jetës që ishte shumë ndryshe nga ajo që e kishte lënë në atdhe, pa njohuri të gjuhës angleze.
Të gjitha këto bashkë Vlorën nuk e thyen, por përkundrazi e motivuan dhe forcuan në kërkim të rrugës së dijes e emancipimit në një vend të huaj. Sapo e gjeti një shkollë që i fronte edhe kujdestari për fëmijë të vegjël, Vlora filloi kursin e parë të gjuhës angleze. Dhe më s'u ndal. Me dy fëmijë të vegjël në krah, vazhdoi studimet universitare, ku studio komunikimin dhe më vonë bëri master në Menaxhment të resurseve njerëzore.
Zhvillimet politike në Kosovë, Vlora vazhdon t’i përcjellë me interesim të madh dhe aktivizëm. Krahas profesionit dhe familjes, Vlora është aktiviste e Lëvizjes Vetëvendosje, dega në Britani. Sot kohën e saj të lirë e ndan mes udhëtimeve të shpeshta në Kosovë dhe familjes e shoqërisë në Londër.
Pra Vlora Pireva, është dhe mbetet tashmë shqiptarja mes profesionalizmit dhe politikës. Ajo është gjithashtu dhe një nënë shembullore, një familjare me plotë angazhime dhe një bashkëshorte e dedikuar. Në tërë angazhimin e saj, atë që vjen që nga dita e parë e shkeljes së këmbës së saj në BM natyrisht shihet më së miri se ka qenë dhe mbetet një frymëzim për mjaft gra të tjera. Natyrshëm ajo në këtë pikë është një referim i vazhdueshëm eksperience, shembulli dhe suksesi.
Comments