Vaso Papaj: Jo një natë, as dy, as tre

(Këngëtarit Sherif Merdani)

Në korrik në mes të verës,

S’ e mbaj mend në ç’vit të lig,

Te ballkoni, prapa derës

Zëri i tij befas u fik.

Zbriti era e çakërdisur

Dhe e shtyu me egërsi.

Nga foleja, të zvarrisur

E përplasi në kuvli.

Ëndërrove botë të lirë,

Dhe të plasën në zinxhirë.

Jo një natë, as dy, as tre,

Po shtatë mijë tridhjetetre.

Pas bedenash si në varr,

Ah, zinxhir, more tinzar:

Lidhe këngën, lidhe erën,

Lulëzimin dhe pranverën.

Po ajo një ditë shpërtheu.

Erdhi,… këngën e rrëmbeu.

Te ballkoni, prapa derës,

Të dha shpirt në prag të verës.

Ah, i dashuri trumcak,

Shkove djalë, u ktheve plak.

Jo një natë, as dy, as tre,

Po shtatë mijë tridhjetetre.