UNE, PERANDORI,
I PERANDORISË SË GJELBËR
Nga Thani Naqo
Zhytur jam në jeshil livadhi,
Aromë lulesh dhe freski ahu.
Poleni më pudroi dhe me spërka nektari,
Nën një tumbë fierishtash mbeta tulatur.
Pop-pop-pop-pop, reh shputat pas truallit,
Lepuri i egër, syvëngërosh.
Le të më shtypin ortekët e mallit,
pop-pop, hop-hop, pop-pop!
Mbi krye kam qiell krejt të gjelbër,
Ndjehem perandor i Botës me Klorofil.
Këtu s'ka komunstë të më shohin vëngër,
Me brirët e turpshëm më këqyr një kërmill.
Ç'ë se bie shi, ç'ë se bie breshër,
E ç'ë se shtron dëbora e bën kallkan?
Me dhe i mbulon vezët një hardhucë e një breshkë,
Më spërkati, bre, breshka, me shurrën e bardhë!...
S’ shoh presidentë, as kryeministra,
As parlamentarë, as buzëqeshje djallëzore.
Gushëkuqët vocërrakë thurin kanistra,
Vargan’ i milingonave zënë për dore.
Me perandorinë time mburrem e krenohem,
Dirigjoj simfonitë e thëllëzave dhe bilbilave.
Në Hotelin e Fierishtave të fle e mos zgjohem,
Gjersa t'më zgjojë M’e Bukura e Dëshirave!
Pop-pop, sërish, reh shputat pas truallit,
Lepuri i egër, syvëngërosh.
Le të më shtypin ortekët e mallit,
pop-pop, hop-hop, pop-pop!
Koria e Florës, Ziçisht, 2006 - Largo, Florida 2019
Comments