Ishte një ëndërr e keqe më the
Dhe me një përkëdhelje më zgjove dikur
Ishte e thjeshtë për ty, fare e thjeshtë
Pastrimi I merimangës që varej në mur.
Një e neveritshme me helm nën kthetra
Ca flokë të kuqe si ndryshk mbi shpinë
Me blozën e shpirtit thurte rrjeta
Të holla të pista dhe pa kuptim.
Ishte një ëndërr e keqe mendoj
Nga ato që thërmohen në gur
Mbase kështu dua ta besoj
Historinë e merimangës që varej në mur.
ZYRTARI HUNDPËRPJETË
Hej ti zotëri me kostum
Që nën jakën e kartontë kravata po të mbyt
As dje ,as sot në mëngjes
Kopshtarit nuk ja hodhe sytë.
Ai lulishten zbukuron
Si një artist i vërtetë
Ti për në zyrë vrapon
Të presin dosje pa jetë.
Lëri dënglat o i mjerë
Hape dritaren e jetës
Shiko jashtë,ka dhe të tjerë
Pak ndjeshmëri më tepër !
Comments