KAM RЁNЁ NË DASHURI
ME TY DASHURI
Si një adoleshent febril
Kam rënë keq
Në dashuri,
E dashura ime diskrete,
As vet s’e di, si rashë kaq keq,
S’e di,
S’e di,
S’e di, vërtet.
SA MIRЁ
Sa mirë
Që ti s’më takove në stinën e rinisë blerore,
Sa mirë që s’të takova dhe unë ty,
Sa mirë që s’u takuam atëherë,
Sa mirë që u takuam
Pikërisht
Tani,
Që ti je e tëra dashuri fertile
Sa mirë,
Sa fat
Që s’u takuam
Në ato vite blerore, fushave me bar të artë...
PRANVERAT E MOSHЁS
Në moshën superbe të Gëtes
U dashurova
Dhe unë me ty,
Siç u dashurua dhe muzgu movё Gëte
Me guvernanten hёnore të tij.
Unë nuk jam Gëtja
Sigurisht,
Por
Si ai
Kam edhe unë në shpirt
Po aq prille dhe lёndina gjithë blerim.
Si Gëtja dhe unë
Nuk kam as edhe një copë dimёr në shpirtin sublim...
TЁ DUA
S’të dua
Akull,
Avull,
Të dua vesë.
Ah, buzët, e mia, buzët e mia eshkë...
PORTRETET TANЁ
Unë të shoh në sy,
Ti
Portretin tim e përcjell
Nga syri në zemër menjëherë
Dhe e ruan në galerinë brilante të shpirtit tënd
Si një portret rembrantesk, i gjithi plener,
I tëri Holandë...
Por unë
Portretin tënd
E ruaj dyfish:
Në zemër
Dhe
Në
Sy ,
E ruaj si një Monalizë, si një Shën Mёri.
PO TI
Unë veten time e ndiej
Të dashuruar
Si në mite,
Po ti?
Përgjigjmu, pra, me shpejtësi mendimi drite...!
E DASHUR
Në e- mailet e mia
Unë të them
E dashur,
E dashura ime finale,
Po ti si ma thua fjalën i dashur në e- mail?
Thjesht si një dhelpër apo si një sutë, sorkadhe?
PЁRKIM I PLOTЁ
Ti idealiste
Dhe unë idealist,
Ti e sinqertë dhe unë i sinqertë,
Por sikur s’jemi të sinqertë, sinqerisht,
Gjersa
Ti mua
Dhe unë ty,
I flasim njeri- tjetrit
Me metafora, simbole, alegori...
SYTЁ
Unë të përpij me sy,
Unë s’ngopem duke të të parë.
Në çfarë materie zambakësh je derdhur,
Si je derdhur kështu, statujë lulore, e kulluar, behar ?
Në vazon rozë të zemrës sime
I kam mbjellur unë sytë e tu
Si dy lule kaltёrore
Dhe ata
Më përkaltërojnë të tërin blu...
PUTHJA
Buzët e tua të plasaritura për një puthje,
( Puthjet janë shiu i buzëve )
Buzët e tua Saharë,
I përmbyta
Me rrebeshin
E shpirtit tim prill.
O, si vërshuan puthjet mbi buzët e tua,
O, si u kthyen befas, nga Sarë, në lëndinë,
Si harbuan ato, si harbuan
Në blerim?
Si u mbushën ashtu
Gjithë petale rozë, me nektar intim...?
FLAKE NDROJTJEN
S’të solla kot në parkun e madh botanik,
S’të ula kot këtu mbi këtë stol,
S’të shtriva mbi bar
Ashtu kot,
Flake ndrojtjen dhe puthmë,
Që të rinohet, të blerohet kjo botë,
Flake ndrojtjen mesjetare,
Përcëllomi buzët me flakë puthjesh stuhi,
Mbulomi me prushin e buzëve, këto buzë febrile,
M’i thith, me afshin me stilin më lirik
Para se t’i mblojë
Një hi i ftohtë,
Anemik...
NUK MBULOHET BUKURIA
Bluza jote
Si pupël kanarine,
Gjiri yt i bardhë, si gjoks pinguini,
Unë e lëmoj edhe më shumë me sferën e syve,
E sfumoj imët, imët me shikimet e mia.
Mos e mbulo, gjirin si zall lumi,
Si u mbuluaka kështu
Bukuria ?!
EDHE NЁ VJESHTЁN E MOSHЁS
Edhe në vjeshtën bionde të moshës
Mes pjeshkave,
Vishnjave,
Qershive,
Ti vjeshta ime bionde bleron përhera
Siç ke bleruar mes akujsh, dëborërash,
Mes gjetheve bionde të rëna si baluke nga era
Ti pa një gjethe tuberkulare vjeshte në shpirt.
Krejt pranverore,
Fllad, puhi
Si dikur
Në adoleshencë, në vajzëri...
EJA
Eja
Unë të pres,
Siç pret bjeshka prillin
Që të çmendet, pastaj, në blerim,
Pasi ka duruar dëborëra,
Shira,
Erëra,
Stuhira.
Pritmë bjeshka ime, pritmë,
Unë do të të vi,
Jo si bar i thatë,
Unë do të të vi si blerim i ri !
KOT E KE
Kot e ke,
Mos bëj kot dush,
Nuk i lan dot ti, puthjet e mia,
Puthjet e mia s’i ke në gji, s’i ke në gushë.
Tё puth
Si romantik
Si realist,
Apo si surrealist,
Unё tё puth vetëm në zemër,
Unë të puth vetëm në jetë, vetëm në shpirt...
MOS THUAJ
Mos thuaj
Jam
Ermimi yt
Ermimi përhapet kaltërsive.
Mos thuaj
Jam
Dëbora jote.
Dëbora flirton me diellin
Mos thuaj
Jam
Lulja jote.
Lulja idilon me bletët.
Mos thauj
Jam
Hëna jote
Hëna s’i ndahet yllit të mëngjesit…
TI JE
Ti je ajri, puhia, flladi im.
Ajrit
Puhisë
Flladit
S ’ua shoh fytyrat.
Vërtet,
Si e ka fytyrën sytë, buzët, ajri,
Si e ka fytyrën, sytë, buzët flladi,
Si e ka fytyrën, sytë, buzët, gjijtë puhia?
Ajrit flladit, puhisë s’ua shoh vërtet, fytyrat, buzët, sytë
Por fytyrën, buzët, sytë, gjinjtë e tu e dashur njujorkeze
T’i shoh me sytë
E dridhjeve të shpirtit tim myzeqar
,
Që me vesën e barit të fushës sime janë larë
DASHURIA IME
Sipas H. Hese
E dashura ime njujorkeze sykaltër.
Unë
Të shoh
Me shpirt si në skype,
Unë të shoh si në skajp me zemër ty.
Kurse ti mua më ndien përtej Atlantikut me sy ...
PRANVERË, STINA IME
Gjithashtu
Nuk jam Lasgush,
Por Lasgushit ia kalova,
Natyrisht,
Jo në poezi,
Jo në art,
Por në dashuri.
Lasgushi
Të dashurën e tij ferishtore
E ndoqi me aeroplan gjer në Holandë,
Unë të ndoqa ty e dashur shumë më larg
Gjer në shtetin Nju Jork,
Gjer në qytetin Najak.
Gjersa të kam stinë
Pranverore
Atje
Në Nju Jork përherë
Mund të rri pa çelur unë kёtu,
Çdo vjeshtë, dimër, verë e pranverë?
DASHURO
Dashuro,
Më tha oqeani,
Siç dashuroj unë brigjet
Siç i përqafoj
Siç i puth
Brigjet unë çmendurisht,
Çdo sekondë,
Çdo minutë,
Çdo ditë.
Dashuro,
Më thanë dallgët atlantike
Dashuro, po munde sa më shumë
Siç dashurojmë e përkëdhelim ne brigjet
Pa u qetësuar, pa fjetur, pa marrë një sy gjumë.
Dhe po të thanë se po "mëkaton"
Dashuro më tepër akoma
Dashuro
Dashuro
Dashuro si një adoleshente.
Dhe shiko po s’e ndjeve veten krejt inoçente.
PASI HUMBA AVIONIN NË VJENË
Pasi humba avionin në Vjenë,
U nisa me taksi
Urgjent.
Udhëtova
Gjer në breg të Atlantikut
Aty pagova kuaj dallgësh oqeanikë.
Dallgët
Si kuaj të kaltër
Me shkumë në turinj
Vraponin me shpejtësi si të ishin kuaj reaktivë
Dhe kuajt e kaltër të dallgëve me sollën e dashur te ti
Para se avioni të ulej në aeroportin,Kenedi»
New York, qershor 2007
Comments