HERMESI
NIPI
Nipi i vogël, Davidi
si agimi,
Dhe unë gjyshi
si perëndimi,
Dialogojmë.
Ai me fjalë
plot të ardhme,
Unë me fjalë
plot të shkuar.
Në sytë e secilit
dashuria ngazëllon.
BAJAMJA
Në mes të dimrit
Pa në ëndërr dashurinë
T'i zgjaste duart diellore
Dhe u mbush me lule.
NË KISHË
Muzikën qiellore këtu
Çdo besimtar
E ndjen
Dhe interpreton
Në mënyrën e vetë.
FQINJA
Fqinja e moshuar
Ndërsa më tregoi se
Pasurinë ia linte
Qenit me testament,
Rënkoi
Thellësisht e penduar që
S'pati mundur dot
Të bënte martesë.
Po përse, përse,
E pyeta gjithë kuriozitet.
Ah, i dashur, ma ktheu,
Nga frika e dreqit
Mos atje gjeja
Zinxhirin dhe frerin.
TJETËR SPECIE
Thirrjes erotike të ujqërve
Iu përgjigjën dhelprat
Duke buzëqeshur me bisht.
Nga ky çiftëzim
I dinakëris me agresiven
Duan të hedhin në natyrë
Një tjetër specie më të përsosur
Për të përgjuar, vrarë, spiunuar.
DAULLJA
Bubullon nga mburrjet:
“ Për lëkurën time
Janë therorizuar
Sa e sa deshë me këmbor,
Unë e para
Në kushtrim e fitore,
Gjëmoj në çdo
Festë, dasëm, festival…
Dhe pastaj më shajnë se
E rrah ca tepër kraharorin
Dhe gjoja nga mendja
Qenkam bosh! “
A MUNDET?…
Kanë dështuar
Ta futin në kanune
Dashurinë.
A mundet vallë
Detit të trazuar
T'i vihen zinxhirë?
HERMESI
Në një anketim
I pyetën njerzit
Se cilin nga
Personazhet e historisë
Do dëshironin
Ta kishin prijës?
Doli që shumica
Preferonin Hermesin,
Perëndinë e mashtrimit,
Mësuesin e intrigave,
Mbrojtësin e mëkatarëve…
MJAFTOHEM…
Ballas një bukurie
Si e krijuar nga
Xixëllima yjesh
E hire pranverore,
Ia çmova lartë
Don Kishotit
Trimëritë për Dylqinjën.
Meqë unë
S'jam i zoti për to
Mjaftohem t'i lë
Sytë te ajo
Të verbohen.
Comments