Halil Rama: Sa shumë do na mungosh e madhërishmja Margaritë!

Halil RAMA – Mjeshtër i Madh

·       Sa shumë do na mungojë mbretëresha e skenës dhe ekranit Margarita Xhepa – Nderi i Kombit…, por vetëm fizikisht sepse zëri i saj do buçasë nga hera në ekranet e televizorëve dhe po ashtu do na shfaqet edhe portreti më i bukur që kemi parë ndonjëherë

Lajmi për ndarjen nga jeta të divës së skenës dhe ekranit Margarita Xhepa ka pikëlluar thellë zemrat e të gjithë shqiptarëve.

Si një nga miqtë e saj të shumtë që pata fatin ta njoh nga afër në disa bashkëpunime të viteve të fundit, në promovime librash e realizimin e disa dokumentarëve kushtuar personaliteve të letrave, ndjej hidhërim dhe më ka pllakosur dhimbja e thellë nga humbja e saj. 

Me miken tonë të përbashkët Nadire Karadaku, e vizituam para disa ditësh në shtëpinë e saj, ku edhe në gjendje shtrati na shprehu mirënjohjen e thellë, mirënjohje që ajo në çdo takim do ta konsideronte si shprehjen më të bukur të njeriut.

Një vit më parë, në ditëlindjen e saj të 90-të, do të shkruaja dhe botoja artikullin “Profili ndryshe i Margarita Xhepës”. Sepse, në sfidë me moshën, kjo margaritare e skenës shqiptare ishte bërë dhe një veprimtare shembullore e Shoqërisë Civile. Si Presidente Nderi e “Jehona Shqiptare” i ka dhënë kësaj shoqate prestigjin që meriton ky emër, qoftë në konkurset e fjalës poetike që ajo organizon (duke ndarë çmime për zërat e rinj), qoftë në veprimtari me karakter humanitar, kur shpërndaheshin ndihma për fëmijët autikë e për persona të kategorisë vulnerabël

Diva e skenës dhe kinematografisë, në 64 vjet ka skalitur në memorien e publikut shqiptar role brilante që prej fillimit të jetës së saj artistike, në vitet 60 dhe deri më tani.

Ajo shfaqej kudo i margaritar, me shkëlqim vezullues.

Sa kënaqësi e veçantë ndjeje kur ndodheshe pranë saj! Unë kam patur fatin ta ndjej këtë kënaqësi në dhjetra promovime librash e dokumentarësh, jo vetëm në sallat moderne të Tiranës, por edhe në mjedisë të hapura në Bulqizë, Maqellarë, Lushnjë, Berat….

Profili artistik i saj është skalitur në mbi 150 role në teatër dhe 32 role në kinematografi, por unë këtë radhë po veçoj shpirtin fisnik dhe human në profilin ndryshe të mbretëreshës së skenës dhe ekranit.

Tre vjet më parë, në dokumentarin “ADNJ-ja e pandryshuar e Shefki Karadakut”, (sipas skenarit tim dhe regji të Bledar Linzës), e madhërishmja Margaritë, do të interpretonte me mjeshtri të rrallë artistike dhjetë poezi të zgjedhura nga libri “FENIKS” i  këtij autori mjaftë produktiv e cilësor që i la lexuesit si testament 35 vepra letrare në poezi dhe në prozë. Dhe jo vetëm me interpretimin, por ajo na mahniti edhe me peshën e fjalës artistike në vlerësimin e krijimtarisë së Karadakut.

Në Bulqizë, po para disa vitesh ku dhe ju dhurua simboli i qytetit minator do na mahniste me interpretimin plot ndjenjë të poezive të autorit dibran Demir Rusi. Kështu, të thjeshtë por gjer në madhështi, e kemi parë aktoren e madhe edhe në promovimin e librave të Barie Çupit e Setki Jasharit, duke interpretuar poezitë e tyre.

Para dy vitesh, në ditën e të moshurave, nuk do të nguronte të ndodhej në Qendrën Rezidenciale “Strehë dhe Shpresë” në Tiranë mes 116 të moshuarve të braktisur. Nëse moderatori i mirënjohur i eventeve kulturore e artistike Defrim Methasani do ta konsideronte këtë si shtëpinë e çdo njeriu në nevojë, e madhja Margarita Xhepa do t’i jepte asaj madhështinë e duhur duke shprehur kënaqësi të veçantë. Kështu, kur ajo u shpreh: “Ndjej kënaqësi të veçantë sot në festën tonë, e juaja dhe e imja”, duatrokitjet e të pranishmëve qenë të fuqishme. Më tej ajo e ndezi atmosferën festive me interpretimin e poezive “Mall” të Kadaresë dhe “Atdheu” të Podrimjes. Sepse malli për njerëzit e kësaj shtrese është magjiplotë. Mall për njerëzit që na kanë humbur, mall për njerëzit që s’i kemi më. Ndaj dhe kjo ikonë e aktrimit shprehej se “Kemi kënaqësinë që kemi punuar me dashuri, që kemi lënë dhe lëmë kujtimet më të mira edhe në ditë të tilla” . Dhe duke vlerësuar punën e shpirtin fisnik e human të këtyre njerëzve që shërbejnë në këtë rezidencë komode, ku në 26 dhoma u shërbehet më së miri 116 të moshuarve të braktisur, Margarita Xhepa vlerësoi se çdo njeri në punën e vetë është artist, i shërben shoqërisë…

Me energji të pashtershme krijuese dhe interpretuese u shfaq kjo zonjë fisnike e me inteligjencë të rrallë edhe para një viti në një nga sallat e  Hotel Tirana “Interanational” në promovimin e dokumentarit “Dilaver Kurti – ikonë e kulturës sonë kombëtare” dhe tre librave të këtij autori me thesare arkeologjike e etnokulturore të rrethit të Matit, ku para një publiku të zgjedhur, mbi 100 personaliteteve të artit, kulturës e letrave, interpretoi mjaf bukur poezinë e poetit Rakib Lasku, kushtuar këtij personaliteti me rrezatim mbarëkombëtar.

Vetëm një Zonjë e Madhe si Ajo, që s’e ndjente peshën e viteve bëri aq shumë për promovimin e vlerave tona më të mira kombëtare. letrare dhe artistike. 

Lushnja, qyteti ku ajo lindi 90 vjet më parë dhe ku mori formimin bazë arsimor ishte dashuria e saj e madhe, ndaj edhe në moshë të thyer, ajo sa herë gjendej mes lushnjarëve në evente festive.

Një vit më parë (2 Prill 2024), në nder të saj, ministria e Ekonomisë, Kulturës dhe Inovacionit organizoi një aktivitet, ku të ftuar ishin figura të njohura kulturore. I pranishëm ishte edhe ministri Blendi Gonxhja. Artisë, kolege dhe miq të Margaita Xhepës morën pjesë në këtë event, duke përcjellë dhe mesazhe për aktoren e madhe.

Teksa shprehu falenderimet, aktorja tha se kjo ishte ditëlindja e parë që festonte në moshë madhore. Ajo tha se ndihej keq kur mendonte se ka humbur njerëz të dashur dhe kolegë pune në moshë të re.

“Në qytetin tim të lindjes, ishte një zakon që nuk i festonin datëlindjet e vajzave. Dhe djemtë e mi donin të ma festonin datëlindjen, por unë iu thoja nuk jam mësuar. Kështu që është datëlindja ime e parë që festoj në këtë moshë madhore. E them këtë sepse më ka pikuar loti që më janë larguar njerëzit e mi të dashur në një moshë të re, po ashtu edhe kolegët e teatrit që kam punuar një jetë të tërë, janë larguar nga jeta dhe pa dalë në pension. Po kështu është jeta, me dhimbjet që të gërshetohen edhe gëzimet e punës.”, tha mes të tjerash aktorja gjatë fjalës së saj në aktivitet.

Aktorja e mrekullueshme, magjia e skenës dhe Teatrit shqiptar, Margarita Xhepa, mban titujt “Artiste e Popullit”, “Nderi i Kombit”, dhe Urdhri i Lartë "Gjergj Kastrioti Skënderbeu".

Sa shumë do na mungojë e Madhja Margaritë, por vetëm fizikisht sepse zëri i saj do buçasë nga hera në ekranet e televizorëvedhe dhe po ashtu do na shfaqet edhe portreti më i bukur që kemi parë ndonjëherë.