Fatmir Terziu: PËRSE BETOHEMI

LEXO RRAHJET E ZEMRËS

Kaligrafia e vetme

që më pëlqen të shkruaj

kur më lexon

është ajo që zemra jote

dikton.

ÇRREGULLIMI I EMOCIONEVE

Në lëkundjen e momentit

emocionet u bënë neps.

Kur gjërat u vendosën

emocionet u strukën në thes.

Nuk i kam ngrënë kurrë emocionet e mia

i kam lënë pa ngrënë

më së shumti në darkë.

Ky është gjithashtu një

Çrregullim Emocional.

NGJYRAT

Nga të gjithë ngjyrat që kam parë

e kuqja, e bardha, jeshilja, bluja, e purpurta,

apo kur Zoti m'i ka sjell në hark

kam zhytur sytë në një libër me Fjalë të Urta,

por mendjen e kam vërdallë

sepse mendoj

se ngjyra

që dëshiroja

u krijua qëkur të pashë për herë të parë.

PËRSE BETOHEMI

Të paktën qëndro për këtë,

i pa-anë.

Pse themi dhe betohemi:

„për sytë e mi“,

kur gjithçka ndodh para syve tanë?

DEHJA

E panjohura pihet aty ku poezia ka ngri

atje ku (ri)krijimi

pi me shoqëri.

E kështu shfaqet aty ku poezia dehet me mendime,

dhe mendimi i tepërt

pi duhan me supozime.

Atje ku zemra mbush pije

deri në grykë

me „vargje plotë pëshpëritje“…

… dhe lag letrat

me poezinë e strukur në një varg

që vë në pikëpyetje

krijuesin e saj.