Cikël poetik me rastin e 25 vjetorit të çlirimit të Kosovës
KOSOVË HYJNORE
Me luftërat të thella sa deti
Binde planetin,
Kosovë hyjnore,
Kur përballë të vinte serbi,
Egërsia e tij mizore…
Buron himni i të rënëve
I të zhdukurve pa varre,
Në shtratin e këngëve
Ndizen zjarre.
E shembe murin e robnisë,
Dheu i përgjakur mori frymë,
O tokë e shenjtë e Dardanisë
Me gjerdan plagësh të pavdekësisë.
Toka Dardane,gjoks i truallit tim,
Vizatohet tani në hartën e botës,
Paçka se të verbërit mendjetym,
Gjuhën me helm kafshojnë…
Ti rend përpara pa u ndalur,
Se mjaft ke vuajtur,
Lirinë kush s`ta ka falur
Me gjak dëshmorësh e ke mbruajtur…
Unë jam mes teje në çdo gëzim,
Pranë teje në çdo udhëtim,
Ti je gjaku dhe nderi im,
Kosovë,
Lart më ngre e më lartëson
Zemra je, që gjakun ma pulson,
Princeshë e dhimbjes time,
Paç në jetë të jetëve bekime!
MITROVICË,SHPATULL E THYER…
Ah,kjo shpatull e thyer
Në trupin tënd, Kosovë,
Kjo dhimbje,ky acar e ngricë
Në të moçmen Mitrovicë…
Mbi lumin Ibër,
Lidhësja urë
Për habi bëhet mur.
Mitrovicë
Dhimbjembërthyer,
Shpatullthyer.
Vdekja me ty luajti një shekull,
E hasmi iku me tërbim,
Po këtu la të fundit kafshim,
Dhe presim që dielli të shkrijë
Të egrën ngricë,
Moj shpatullthyer
Mitrovicë!...
PRESHEVË,KRAH I PRERË…
Kambana zgjon
Shenjtorët tek flenë,
Mes botës që kallet.
Një diell i uritur
Këtu ndalet.
Në këtë Luginë kam varret
Tokën dhe zjarret,
Bashkë me hirin
Gjuhën dhe këngët,
Emrin tim shekullor.
Krah i prerë shqiptarie
Është Lugina,
Peng i mosnjohjes
Në kërthizë të Evropës.
Preshevë,
Medvegjë,
Bujanovc.
Krahu trupin kërkon
Siç ka qenë
Jetë e mot!...
PËLLUMB I PAQES
Ibrahim Rugovës.
21 janari,
Akull,
Acar,
Dhimbja borën edhe më ngrin,
Nuk ndrit dita si më parë
Në Prishtinë….
Iku Ai mendjekthjellëti,
Dhe mentar e luftëtar,
Toka rënkon së thelli,
Në të ftohtin janar.
Për Rugovën vizionar
Në beteja të vështira,
Se ish gen dorë e parë
Emërliria…
Brenda zemrën kishte qiellin
Brenda fjalës aq butësi
Fjala e tij përkulte hekurin
Qe balsam për çdo njeri…
Në Amerikë dhe Evropë
Në tryeza, kancelari,
Erdh e bukur dhe e ngrohtë,
E mençur fjalë e tij.
Ndriste dhe hapte mundësi,
Aq sa edhe Pëllumb i Paqes,
Rrrahu krahët afër tij…
Që ta merrte këtë butësi….
ADEM JASHARIT
Nuk gjendet fjala për ty,
Para teje fjalët dridhen,
Se ti lirisë i dhe rini,
Kosovës i dhe emblemën…
Ti gen fisnik iliro-dardan,
Ardhë nga legjendat mitike,
Mbi truallin tënd fytyrën mban
Njomur si me frymë biblike…
PËRMENDORE E LIRISË
Ramush Haradinaj…
Fis i thinjur Dardanie
Nëpër shekuj, kryet lart,
Zjarr i pavdekshëm lirie
Në çdo shtrëngatë.
Vëllezërit e tu shenjtorë lire,
Janë zemër e pavdekësisë,
Për Kosovë,flamur lavdie,
Për kombin e shqiptarisë.
O Ramush,dashnor i diellit,
Zemërndezur,atdhetar,
Ti ke mbetur ballë i trimit
Ëndërrbardhë e zemërzjarr.
Për Kosovën je flamur
Sa të ketë diell e hanë,
Nuk lëshon as tokë,as gur
Do të jenë aty ku janë.
Nuk tundesh nga rrëmeti,
Kryelarti i shqiptarisë,
Se nuk shkelet amaneti
I dëshmorëve të lirisë.
Simbol i shenjtë,nderim
Za i fortë maturie,
Rrufe thyen me guxim,
Përmendore pavdekësie…
VIGANËT E PAFAJËSISË
Hashim Thaçit, Kadri Veselit,Jakup Krasniqit…
Ju jeni bijtë e Kosovës kreshnike,
Dhe si male kryelartë
Qëndruat përballë stuhive
E tash përballë stuhisë tjetër në Hagë…
Fajësoheni pse luftuat për liri,
Ndaj bishës shoviniste serbe,
Bota njeh shumë çmenduri
Dhe kjo, çmenduri e të çmendurve…
Si kripa në ujë shkrihen akuzat,
Në heshtjen tuaj pa fjalë,
Dhe ju sërish shtrëngoni bashkë supet
Si dje, në vijë të frontit të parë…
Dhe shkëlqen pafajësia juaj
Si borë e parë në mal,
Në jetën tuaj vitet më të çmuara
Janë ato , kur ballëpërballë
I ndenjtët bishës dhe Kosovës i dolët zot…
Ani pse koha shpesh i bën sytë qorr,
Ani pse,harrohet çdo sakrificë
Ju ngriheni në Hagë madhështorë,
Viganë pafajësie, monumente epike…
Comments