Tashmë nuk ka rëndësi
nëse e arrijmë cakun,
oh është veç një gur idiot
të cilin dikur e vuri urtia
në vend të përgjigjeve,
sepse pyetjet ishin të tilla
dhe mendja duhej kapur diku.
Thjesht një pikë hapësire është
për të krijuar distancën e nevojshme
që nis nga ne,
aq sa për të thënë; u bërë rruga
e cila duhet kaluar
të vijmë në vete.
Ndërkohë që nisim
të gdhijmë ditët
syve të shpirtit,
ku hapen kanatat e heshtjes
dhe mësojmë të qepim
vetminë që na bie tamam,
njësoj si fjalën.
Kështu, kemi guximin
të jemi të vërtetë
edhe para vështrimit të tjetrit.
Comments