Alban Gaba: Miting madhështor në New Jersey

Librat e autorit Fatmir Terziu edhe në Garfield Public Library të SHBA-sē

Më 1 Qershor 2024, e shtunë, ora 11:00 Garfield Public Library, në 500 Midland Avenue, NJ 07026, të SHBA, libri i shkrimtarëve shqiptarëve, që krijojnë në hapësira të ndryshme të Globit, ishte kryefjalë e radhës. Ishte për shumë e shumë arsye. Arsye që lidhen me librin, kulturën dhe promovimin. Ishte festë dhe kishte festivitet. Kishte gjithë hapësirën shqiptare të gëlltitur estetikisht në një një. Një hapësirë e bukur, e zhvendosur bukurisht në mesin e të pranishmëve, vendas, në kuptimin banues lokalë të zonës, por dhe të ftuar e të ardhur enkas nga të gjithë cepat e SHBA-së. Dhe kur ndodh kjo dihet festivja që rrok dhe mbërthen shqiptarët…

Kështu mes muzikës, vallëzimeve dhe një programi të spikatur, të mirëorganizuar dhe tejet profesionalisht, „The Albanian Alliance of New Jersey“ prezantoi „Albanian Author Talk“ si një koleksion pasqyrash që pasqyrojnë, jo vetëm historitë dhe përvojën personale si krijues shqiptarë jashtë vendit, por edhe fatin e përbashkët si personazhe kryesore në serinë e përditshmërisë sonë të globalizuar, nën protagonizmin e autorit të një Antologjie, Ismet Mehmeti dhe poetes Arjana Fetahu Gaba. Në këtë ditë të shënuar dhe të shtrenjtë për mua, falenderimi i jashtëzakonshëm shkon tek gjaku im, ai i cili me kursimet dhe dashurinë e madhe bleu dhe dhuroi disa nga titujt e librave të mi për këtë Librari dhe për këtë eveniment. Dashuria e „The Albanian Alliance of New Jersey“, shkon përtej kësaj. Shkon përtej çdo falenderimi, dhe urimi. Përtej çdo fjale të përzgjedhur. Të pranishëm të shumtë, që kishin zbritur ditë më parë, për këtë eveniment të jashtëzakonshëm, kishin mundësinë ta zotëronin pasurinë e vyer të librave dhe të mbanin në duar fjalët që, shpresoj, i kanë emocionuar gjatë viteve të krijimit të tij dhe i kanë bërë të ndjehen me ndjenjën e përgjithshme të shqiptarizmit në botë. Dhe është qëndrueshmëri përkundër pasigurisë, vetëbesim përkundër dekurajimit dhe vitalitetit, pavarësisht nga shndërrimi i vazhdueshëm i shpirtrave në trupa të pangopur. Etja e vazhdueshme për shqiptarizëm më bën t'ju drejtohem juve, lexuesit e mi virtual, me "Përshëndetje, Shqipëri!" Nëse ende nëpërmjet librave të mi, atje dhe kudo që ndodheni, mund të më dëgjoni, dijeni se nëpërmjet jush po rimendoj botën!.

Po e rimendoj se organizatorët e patën theksuar mjaft bukur në tre pika, se kjo ngjarje paraqet një mundësi të jashtëzakonshme për: 1- Njohjen dhe promovimin e veprave të autorëve shqiptarë në komunitetin tonë.; 2- Hapjen e një koleksioni të ri librash, të dhuruar nga autorë shqiptarë të njohur. 3- Pasurimin e Bibliotekës Publike të Garfield me këtë koleksion të veçantë.

Sikurse citohet Garfield është një qytet me një numër të konsiderueshëm prej rreth 3,500 shqiptarëve, prej të cilëve rreth 1,150 janë nxënës në shkollat publike. Kjo iniciativë për të sjellë një koleksion të gjerë librash shqiptarë në bibliotekën e qytetit bëhet një shtesë e rëndësishme për kulturën tonë. Natyrshëm Garfield ndjeu zgjimin e një dite të re, dhe shqiptarët ishin „mëkatarët“ e zgjimit të tij herët në një të shtunë të tillë. E zgjuan se Programi i Eventit nisi në orën 10:30 të mëngjesit dhe vazhdoi me një tridhjetëminutësh pritje, përmallje, shtrëngim duarsh dhe respekt reciprok. Më pas Mirëseardhja dhe regjistrimi i pjesëmarrësve, ia dha radhën fjalës përshëndetëse nga Albanian Alliance of New Jersey, e natyrshëm mikes së kësaj shoqate, Ambasadores së Shqipërisë në Kombet e Bashkuara, SHkëlqesisë së Saj, Suela Janina, dhe po ashtu një miku tjetër, Kryebashkiakut të Garfield, këshilltar. Në atë rast u pritën dhe figura të tjera të larta nga Bergen County.

Në një hapësirë kohore midis 11:30 AM - 12:00 PM, u bë një prezantim i antologjisë së ndërtuar nën përkujdesjen e Ismet Mehmetit. Në procedurën tjetër ishte dhe dhurimi i koleksionit të librave të shkrimtarit, poetit dhe studiuesit shumëplanësh, Fatmir Terziu dhe të librave nga disa poetë të tjerë.

Lexime letrare nga poetë të mirënjohur, si dhe Performanca muzikore dhe valle tradicionale shqiptare shtuan larminë e eventit në fjalë, ku u duartrokitën dhe mjaft poetë të shquar të antologjisë shqiptare të 100 viteve të fundit. Gjatë këtij eventi, Kryebashkiaku i Garfield, Richard Rigoglioso, shpërndau certifikata mirënjohjeje për autorët e pranishëm. Sikurse u tha „Albanian Alliance of New Jersey“ ka siguruar dhe dhuroi disa libra të Prof. Dr. Fatmir Terziu, duke pasuruar më tej koleksionin e bibliotekës së këtij qyteti të SHBA-së.

Duhet theksuar se për këtë eveniment ftesat kanë qenë publike dhe ishin ftuar të marrin pjesë në këtë ngjarje historike duke kontribuar në pasurimin e trashëgimisë kulturore të qytetit të gjithë të mundshmit. Pjesëmarrja ishte një nder dhe mbështetje e madhe për komunitetin shqiptar në Garfield.