26 vjet nga masakra në Krushë të Madhe

Masakra në Krushë të Madhe është ndër masakrat më të mëdha në Kosovë gjatë luftës së viteve 1998-1999. 26 vjet më parë nga 25 deri më 27 mars 1999, në Krushë të Madhe të Rahovecit 243 persona u masakruan nga forcat serbe. Krahas kësaj u dogjën edhe 893 shtëpi. Edhe sot e kësaj dite, shumë persona nga Krusha e Madhe vazhdojnë të jenë të zhdukur. Masakra në Krushë të Madhe ishte pjesë e aktakuzës për krime lufte kundër kasapit të Ballkanit, Sllobodan Millosheviç, dhe disa udhëheqëseve të tjerë politikë e ushtarakë serbë. Pavarësisht kësaj, për këtë masakër asnjëherë nuk pati një proces të mirëfilltë hetimor dhe askush nuk është dënuar drejtpërsëdrejti për krimet e kryera në këtë fshat.

 ......................................................................................................

Vizitori i parë i Krushës së Madhe

Nga Fatmir Terziu

(Ribotim me këtë rast)

Miliona vite u krehën në plazmin e qelqtë të lotit,

në një pellg të përlëngët,

një flok gërshetë i bukur me çantën e madhe të jetës,

u tret, kapi retë që mëgëllyen

fytyrën e ëndërrave djaloshare.

Mbi një fletë libri të shpërngulur të shkruar

sofra e bukës në odën e madhe

ka mbetur shtruar. Pret për tu lexuar

mbi lëkurën e vjetër të plisit

ishte letra më e mirë nga shqipja,

duke shkruar në qiellin e papirusit.

Uroj që ta njihja.

Në ritualin e çajit,

nga duart e grave të Krushës së Madhe

kam mësuar se si të pish nga sytë e një vejushe

të mbetur mes tregimeve në rrugët e Varrezave masive.

Gjithmonë arrijnë në kohë vizitorët e huaj

të shkruajnë për të mos harruar!

Vizitori i parë i Krushës së Madhe,

ishte vargu i një kënge

nisi me refrenin e djepeve në vaje

bitisi me fatin e jetës … në atë mbrëmje.